Izithakazelo zakwa-Chibi
Tibane,
Mlambo,
Mful’omkhulu ongawelwa muntu,
Uwelwa zinkonjane kuphela,zona ezinamaphiko!
Category: Izithakazelo nomlando Page 15 of 18
Izithakazelo zakwa-Chamane
Wosiyane,
Nzama,
Mashiza,
Dingila,Chube,
MaChube amahle,
Nombhoco, Chube,
Gcugcwa,
Zukula kaNombhoco,
Zukula, nina baseS’Chamaneni,
Wena owawela ngelibanzi kwasala izindondo zacoshwa abafokazane,
Nina bakwamfazi kashaywa ngemvubu,
Kodwa ushaywa ngombhombolo wesidwaba,
Mkhandi wensimbi,
Nina enidume ngokugcagca insimbi amanye amakhosi edume ngesithembu,
Gcugcwa ka-Ncameni,
Ncameni ka-Nozaca!
Izithakazelo zakwa-Chagwe
Mshengu,
Nzima, Mayane,
Gugushe!
Izithakazelo zakwa-Cebekhulu
Gobeni,
Nsele,
Mangethe Zikode kaPhikela,
Wena Wasetsheni,
UZwane akadlelanga phansi wadlela emkhombeni wezinyamazane,
Edla im’hlambi yezinkomo zamadoda,
Ndlangashushwana ngokudla amaNdebele,
Bathi uZwane udleni kwaMtambo?
Kuthiwa udle izinjana zimbili zigcwele umdakana,
Ntshosho!
Wena kaMafu kawalingani,
Aphansi naphezulu,ngoba aphezulu angubo ngubo,
Ntsele kaLinda kaMkhonto,
Awungilinde ngilande ezami eZungeni,
Mthanti,
Nduna ngokuthwal’ isila sensele,
UNtsele kangakanani,
Ngoba nasothini lomkhont’ angahlala.
Isikhova singathi,”hhi” sibona imihlambi yezinkomo nabantu,
Nin’enadlel’encazeni,
Nin’eniphakel’umyeni odengeleni,
Ngoba ningabenkosi.
Zikode kaNdabansele,
Mabhayi kawalingani nawangaphansi nawangaphezulu,
Mangethe,
Nina bakaVezi Owadl’isihlahla njengengwababane,
Zwane,
Phikela wengwe,
Nselenduna nina basetsheni laseNtshenteka,
Mandaba,
Ukub’uMandaba wayengehlanga phezulu saso buswa ubani?
Zinkomo zakwaLinda ezimhlane ugcwele udaka,
Ezathi zidl’ubhoqo kanti ziyawuhlakulela Ntshosho,
Nina BaseMangweni!
Izithakazelo zakwa-Buleni
Sgwaza,
Nkomedl’abantu,
Sgwaca esagwac’ethafeni,
Mlomula!
Izithakazelo zakwa-Buthelezi
Shenge,
Sokwalisa,
Mnyamana kaNgqengelele,
Phungashe,
Sondiya,
Mnandingamondi,
Wena owadliwa zindlovukazi zamlobolela,
Nina zinyawo ezimahhele,
Enaganisa izintombi nanganye nangambili!
Izithakazelo zakwa-Bhebhe
Makhedama,
Soyengwase,
Nina bakaBhebhe kaMthendeka,
Nina bakaSoqubele onjengegundane,
Nina baseSiweni,
KwaMpuku yakwaMselemusi,
KwaNogwence webaya,
Dlomo weNdl’ende,
Sihlangu samavaka seswel’ababhemu,
Wen’owalala nomunw’endunu, wavuka wawuncinda wawukhomb’ilanga,
Makhul’emini abafokazana bekhul’ebusuku,
Zingwazi zempi yakwaNdunu,
Njoman’eyaduk’iminyakanyaka,
Yatholakal’onyakeni wesine,
Yabuye yatholakala ngowesikhombisa,
Langeni,
Owavel’elangeni!
Izithakazelo zakwa-Blose
Ndelu,
Madiba,
Dimba, Duma,
Mseleku,
Phonsel ‘obusuMajonjobela oThunga ligcwala lingethiwanga ligcwala ukuhlakanipha,
Bohlela,
Noncengwa,
Wena owancengwa izintombi zathi,”sicela usishade Blose”,
Chobile,
Wena owachoba izintwala zenkosazana,
Shinga,
Akushinganga mina kwashinga isibongo!
Izithakazelo zakwa-Biyela
Ntshangase, Menziwa,
Njezi ka Xhoko!
Ndabezitha!
Mvundlane wasoKhabeni,
Mbeng’osinda abosi,
Mgazi!
Izithakazelo zakwa-Biyase
Khathini,
Ziqubu,
Ngonyama yenduna,
Luphondo!