Izithakazelo zakwaMashiyane
Sondaba,
Sontshibe,
Wena waseMthandeni.
Skhabe,
Wen’owakhab’inkosi ngonyawo akwaba `ndabazalutho,
yavuka kwaxolisa yona, yathi: “Phepha Sondaba!”!
Category: Izithakazelo nomlando Page 9 of 18
Izithakazelo zakwaMasina
Mathebula,
Mfaz’omabele made ancelisa ngaphesheya komfula,
Mkholo!
Izithakazelo zakwaMasinga
Shobane,
Ngonyama,
Mbokweni omhlophe ogibela igagasi,
Mangethe!
Izithakazelo zakwaMasondo
Nyambose,
Mthethwa,
Dingiswayo,
Donga dilika,
Mathangana amahle afanele ukwenziwa,
Nina enalandela amasondo ezinyamazane,
Nina eniphuza amanzi emichachazweni!
Izithakazelo zakwaMaseko
Ngcamane,
S’dwaba siluthuli,
Mdandulukwane,
Khubonye kaNdlovu,
Ndlovu ezidl’ekhaya ngokweswela abelusi,
Nina bakaKhabangobe kaMaphanga!
Izithakazelo zakwaMasango
Masango,
Vezi, Mvalane,
Wena owavala ngomkhonto emazibukweni,
Ntumbeza, Ntus’emhlophe,
Mdluli!
Izithakazelo zakwaMaphumulo
Mashimane,
Doncabe,
Zikode,
Zukuzela,
Dubandlela,
Mgobode,
Masiyane,
Cwalile!
Izithakazelo zakwaMaphanga
Mnguni,
Qwabe, Gumede,
Mnguni kaYeyeye,
Osidlabehlezi bakaKhondlo kaPhakathwayo,
Abathi bedla, babeyenga umuntu ngendaba
Abathi “dluya kubeyethwe”,
Kanti bahlinza imbuzi,
Bathi umlobokazi ubeyethe kayikhuni,
Sidika lolodaba,
Phakathwayo!
Wena kaMalandela,
Ngokulandel’ izinkomo zamadoda,
Amazala-nkosi lana!
Mpangazitha!
Izithakazelo zakwaMaphalala
Khoza,
Mtimande,
Mavuso, Msuthu,
BeSuthu BaseNkalanjana,
Abamaziny’ansansa,
AbaseMbathamkhonto njengobhedu,
Abehla ngesilulu,
Bathi: “Zibukuzana zani lezi na?”,
Kanti `zinqama,
Wena wakwaMehlwana,
Wena wakwaMlotha,
Wena wakwaNungwana,
Msuthu waseMawusweni!
Izithakazelo zakwaManzini
Gwabini,
Zungu, Geda,
Ncwane, ngankomo yaseMahenyeni,
Nyama kayishi, isha ngababhebhezeli,
Wena owaphuma ngenoni emgodini,
Sengwayo!